قررت اْرجع اْكتب تانى بعد فترة كبيره من حالة الاْكتئاب وطبعاَ كل واحد هيقولى اْكتئاب اْيه يا عم دحنا فى عصر الحرية وبهجة الثورة هو بس فى شوية فلول من النظام السابق عايزة تعمل ثورة مضادة وشوية وهنخلص من الهم ده كله
وهنا السؤال من الذى صنع الثورة المضادة هل هم فلول النظام بس اْم ان شباب الثورة ساعدوا فى صناعتها من غير مايحسوا وهنا لازم نضع شوية نقاط توضح الموقف
1 - هو مين الى طالب بخروج الجماعات الوهابية الى بيقولوا على نفسهم سالفين ومين الى كان سبب فى خروج عبود الزمر واْتباعه من السجن وخلاهم يهدوا الاْضرحة ويكفروا نصف الشعب المصرى
2 - مين الى سمح بفتح قنوات شيوخهم ونشر فكرهم وهم والله الذى لا اله غيره لايفقهون شىْ فى الدين مين سمح لهم باْخراج شيوخ الاْزهر من المساجد وصعود المنابر فيها بالاْكراه مثل ما يحدث فى مسجد النور والبيه اْبو طربوش الى فاكر نفسة خليفه
3 - مين الى حول الاْستفتاء على التعديلات الدستورية الى اْستفتاء على المصحف او الاْنجيل ومن الذى سمح بشعار غزوة الصناديق
4 - مين الى بيستغل ظروف البلد وبيبيع السلع الطاء طائين ولاعزاء للفقراء
5 - مين الى كرس وقته كله للقضاء على الفساد السياسى وترك الفساد الدينى يسود ارض مصر مين
6 - مين الى رفضوا اْحترام القانون مع اْنهم رجال قانون ودخلوا اْخرجوا محامى من قفص الاْتهام وهربوه بعد ماخد حكم مين
7 - وهل كل من كان فى التحرير مفيهومش موظف مرتشى وبيفتح الدرج للشعب وماشى على مبداْ اْى خدمة يا اْستاذ مفيهومش موظف سنترال بيمشى محاسيبة من من الطابور مع ان فية ناس عندها سبعين وتمانين سنه
يا اْخواتى شباب الثورة العظيمة اْسف اْقولكم ثورتكم ناقصة الشق الاْخلاقى والاْدبى والدينى اْهتممتم بالسياسة مع اْن الله قال وما خلقت الاْنس والجن الا ليعبدون
لابد ان تخرجوا من دائرة يا اْما جهلة متزمتين اْو متفتحين من غير حيا ولا دين اْحنا اْمة وسط اْذا لم نحمى ديننا من سيحميه والله يقول( اْن الله لا يغير ما بقوماَ حتى يغيروا ما باْنفسهم )صدق الله العظيم
اخوكم
محمود المصرى
ازيك يا محمود ؟ حمد لله على السلامة الأول..ثانياً معاك حق طبعاً و مش اللي انت اتكلمت عنه بس ، أنا في رأيي ان مين كمان بيشجع الناس بتسيب شغلها و تطالب بحقوق هما بنفسهم سابوها سنين و سنين ..مين بيشجع الناس تنزل و تحتفل في الشوارع على حساب المرور
ردحذفمين اللي خلا شكل المتظاهرين قدام فئة من الناس شوية صيع قاعدين في الميدان
مين اللي من ساعة ما لقى إن لأ رنتها حلوة و بتجيب نتيجة قرر يقولها على كل حاجة
مين حلل اننا نطالب بالحرية والعدالة و حرمها على غيره ؟؟ (المسئولين أو الرموز النظام السابق)
لو قعدنا نقول مين كتير مش هنخلص ، بس أنا مش مكتئبة ، لسبب هو ان الاكتئاب ده لو كان اللي بيحصل ده مفاجأة أو غير متوقع !
لكن هو ده مجتمعنا ، الناس خدت على كده
الناس مش متعودة تحكم صح
الناس مش متعودة تنظم أولوياتها
الناس مش واخدة على الحرية و مش واخدة على ان صوتها ليه قيمة و بيأثر
هناخدلنا وقت لغاية ما المجتمع يتعود على النظام
لغاية ما يعرف الصح الللي فعلاً صح فين و الغلط فين
أنا متفائلة ، مش مستنية اي نتائج دلوقتي خالص على فكرة ، و متوقعة اسوأ من اللي بيحصل اكتر و اكتر .. بس بإذن الله العجلة هتبدأ تقف و ترجع تدور في الدايرة الطبيعية بتاعتها اللي كلنا مستنيينها و نزلنا نطالب بيها
حمد الله بالسلامه
ردحذفمنور مدونتك ومش تغيب .. لكن انا ح اغيب ههههه
ربنا يهدى الحال ويكتب لمصر السلام والامان
وشكرا للتهنئه بالعيد ومرورك بمدونتى
لك منى خالص التحيه
ازيك يامحمود
ردحذفمالك كده راجع شادد حيلك ع الناس ياعم
شوف أناهختلف معاك في بعض النقاط
مادمنا أصبحنافي زمن الحرية يجب عليناأنانسمح للكل بأن يقول رأيه ويعبرعنه بحرية مطلقه لكن الخوف مش منهم الخوف لأن معظم الناس دول مش عارفين أن الحرية مسؤلية ولازم يلتزموا بيها جدآ
وهقولك في الأخر أن اللي عمل الثورة وحبس الحراميه يقدريعمل كتييييييييييييير ومش هنسمح لحدتاني يركب علي أكتافنا خلاص بقي انتهي الدرس
تحياتي ليك ولاتنقطع تاني عن التدوين
الحمد لله عل سلامتك
ردحذفأهل مكة أدرى بشعبها.
كنت هنا، شكرا للدعوة
الاول عاوزة اعرف انت علي قيد الحياة بعد الكلمتني دول ولا حد قالك انك انت نفسك فلول وعميل ؟؟
ردحذفانا كمان رافضة جدا نظرية اننا ضحايا الفلول والثورة المضادة ,, لا احنا اعداء نفسنا .. وانا متفقة معاك تماما في اللي قلته رغم ان بعضه افراز طبيعي للحراك انما احنا مستجيبين لكل حاجة وكاننا لا ارادة لنا.. صحيح مش كل الثوار كانوا شرفاء وان كان كل الناس محتاجين الثورة لان غير الشريف كمان يتعرض للكثير كما الجميع
علي العموم بكرة نكبر كلنا ونفهم .. اقصد كلنا كشعب
احنا لسة صغيرين اوي وكل يوم بيتم اثبات ده
تحياتي