الخميس، 29 أبريل، 2010

تعليم للكبار فقط


انا صحيت النهارده الصبح والحمد لله كنت فايق على الاْخر بس للاْسف الشيطان لعب فى دماغى وقالى اْتصفح فى الجرايد وطبعاَ يا صباح العكننه لقيت منشيت طويل فى جرنال الوفد بيقول المدرسين فى مصر يمتنعون عن تدريس التربيه الجنسيه وقعدت اْفكر هل ممكن يحصل ده فى بلدنا وتعالوا نتخيل اْذا ده حصل يا ترى طريقة التدريس هتكون اْزاى وياترى شكل الكتب بتاعت المنهج المنيل ده هتكون اْزاى وياترى فى اْمتحان عملى
المهم يا خونا انا زى كل مره سرحت وتنحت وفى الاْخر نمت وحلمت والمره دى مش زى كل مره انا حلمت المره دى اْننا تلميذ فى الثانويه العامه وطبعاَ فى اْول السنه بنروح نستلم الكتب ولقيت فى وسط الكتب كتاب غريب عليه صوره لواحده حرانه ومن كتر الحر قلعت كل شىْ وكان مكتوب عليه التربيه الجنسيه للصف الاْول الثانوى تاْليف الاْستاذه الخبره شارون ستون ولكم ان تتخيلوا المنهج منهج البعض قال عليه منهج طرى والبعض الاْخر قال ده منهج سيكو سيكو المهم روحنا خدنا الجدول ولقينا اْن عندنا اْربع حصص تربيه جنسيه وطبعاَ كلهم يوم الخميس
وجاء اليوم الموعود اْول حصه فى هذا المنهج الاْبليسى دخل علينا شاب حليوه والمفروض اْنه معاه دكتوراه فى عالم قلت الاْدب وقال لنا النهارده اول درس فى المنهج وبيتكلم عن البوس وعلى غفله راح شادد احدى الزميلات وراح بيسها وقال ده اْول نوع فى البوس وهو البوس اْلى على غفله ولكم اْن تتخيلوا مدى اللهفه عند الشباب لحصة العملى وللاْسف مش هقدر اْشرح اْكتر من كده عشان الرقابه ولكن الصراحه المنهج ده كان ليه مفعول السحر فى زيادة عدد الاْصحاب الى بيذكروا مع بعض وجينا للنص التانى من المنهج وهو الخاص بالنصف الاْسفل من الاْنسان وهنا اْنا صحيت والحمد لله قبل ما تبقى ماليطه وقعدت اْساْل نفسى يا ترى الاْمتحانات شكلها كان هيبقى اْزاى وايه الادوات اْلى هنخدها معانا بلاش كده طب المراجعة النهائية هتبقى اْزاى
وهنا انا رميت الجرنال ده وقولت اْعوذ بالله من الاْخبار اْلى تسد النفس دى على الصبح ومسكت جرنال تانى وهو جرنال الفجر قولت يمكن المعارضه فيها الرماء ولسه بفتح اْول صفحه لقيت خبر بيقول طلاب كلية البنات يطالبون باْن تكون الكليه مختلطه وهنا اْنا اْغمى عليا
الحقونىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

الاثنين، 26 أبريل، 2010

اْنا عا يش ليه


اْنا عايش ليه مستحمل كل ده ليه
طب وانا عايش كده ليه حزين محتار كده ليه
انا نفسى اكون انسان اعيش حيوان عشان ايه
انا نفسى اكون واكون واتحدى كل الكون
وممكن اعيش مجنون واعيشها عاقل ليه
اعيش حياه متلخبطه بس من غير مرمطه
حياه جميله مكحرته مفيهاش باشا ولا بيه
حياه من غير لحمه غاليه واْزمة اْنبوبة بتوجاز
نفسى اعيش فى شقه واسعه فيها ميه ونور وغاز
اْتجوز واْجيب عيال عبقريه عيال جميله وميه ميه
نفسى اْختار مين اْكرهه ومين اْحبه
مين اْطلع معاه ندل ومين اْقف جنبه وعشان اْيه
واْقف جنبه مقابل اْيه
وفى النهايه اْنا بساْل نفسى
اْنا عايش ليه
اخوكم الشاعر المجهول
محمود المصرى

الخميس، 22 أبريل، 2010

كبش فداء


كل الناس بتتكلم عن محمد البرادعى زى ميكون عندهم خبره سياسيه كبيره قوى لكن الحقيقه اْنهم ميعرفوش ان اْلى بيرشحوا البرادعى بيرشحوه عشان يحققوا طموحهم السياسيه سواء كانوا اخوان مسلمين او بعض الكلمنجيه زى حركة كفايه وبتوع 6 ابريل والاْخوان المسيحين وى وى وناس كتير لكن الحقيقه ان الناس دى عايزه كبش فداء يشيل الطين عنهم ينفخوا فيه ويسيطوه عشان يقدروا يعملوا التعديلات الدستوريه براحتهم وهما بعيد الراجل بقى يتشتم يتبهدل واْذا حصل وبقى رئيس الجمهوريه هيعملوا كل الى فى وسعهم عشان يخلوه يسيب المنصب ده وغالباَ بحجة انه مش على وفاق مع طموح الشعب المصرى انا بقول احنا نطلب التعديل من غير وسيط بصوت واحد ونشيل الاْحزاب ونعمل اْنتخاب لكل منصب فى البلد وزير غفير اْى حد يكون من اْختيارنا نبقى بنى اْدمين بجد مش لازم راعى غنم يجرنا بعصاه نفتح المجال لكل واحد عايز يخدم البلد نعمل منظومه كامله تطور البلد من جديد نحط الراجل المناسب فى المكان المناسب مش يبقى وزير تربيه وتعليم دكتور اطفال ولا نشوف يوسف والى تانى حاولوا تتصرفوا صح مره واحده فى حياتكم مش كل واحد يطلع يقولى البرادعى البرادعى وهو ميعرفش يعنى ايه نشرة الاْخبار المفروض اْلى فاهم يفهم اْلى مش فاهم الشباب اْلى عايز يخدم البلد صح ينزل يفهم الناس ويديهم خلفيه عن كل حاجه خاصة بسياسة البلد عشان لما يختار حد يمثله يختار حد ميندمش على اختياره بعد كده حتى ولو كان البرادعى ده بقى عامل زى كوكاكولا هى التطور الطبيعى للحاجه السقعه وهو التطور الطبيعى لرئيس الجمهوريه واخيراَ ادعوا الله ان يرحم كل مصرى من الحركات والمعارضه زات الميول الخاصه الى عايزين يخربوها وياكلوها قولوا اْمين
ملحوظه
اْعتقد ان البرادعى مش هينجح يكون كبش الفدا اْلى هما عايزنوا عشان الكبش غلى قوى ده الجملى باْربعين جنيه فما بالك بالضانى كان غيركم اْشطر

السبت، 17 أبريل، 2010

اللحمه سنة 2030


قعدت اْفكر يا ترى اْيه اْلى هيحصل للحمه فى المستقبل بعد الغلاء الى جرالها سرحت شويه وقعدت اتخيل مثلاَ لو وصلنا لسنة الفين وتلاتين اللحمه هتبقى بكام هنلقيها ولا لاْ ونعست وانا قاعد وحلمت والايام دى انا بحلم كتير قوى المهم حلمت ان انا فى سنة 2030 ورحت اشترى كيلو لحمه والغريب اْنى ملقيتش ولا محل جزاره فى المنطقه لابتاعتى ولا المناطق الى حولينا ورحت اساْل واحد كان واقف قريب منى لو سمحت فين اقرب محل جزارة هنا قالى انت مجنون انت مش خايف حد يسمعك قولتله ليه هو انا بدور على مخدرات قالى يا عم المخدرات ماليه السوبر ماركت لكن انت بتدور على شىْ محرم دولياَ قولتله شكلك مجنون وعايز تهزر قالى اْنت مش مصدقنى طب اْنا كنت عايز اْدارى عليك بس اْنت اْلى اْجبرتنى على كده يا شويش يا حكومه وفجاْة لقيت عسكرى دخليه جاى عليا وبيقول فى اْيه اْلى حصل يا اْخينا راح الراجل التانى قاله الراجل ده عايز يشترى لحمه قالى العسكرى يا نهار ابوك اسود انت عايز ممنوعات قولتله ياعم انت بتقول ايه ممنوعات ايه الى بتقول عليهاانا بقولك عايز لحمه مش بانجو قالى انت كمان بتنكت قدامى على القسم ولقيت نفسى رايح على القسم قال ايه بتهمت انى عايز لحمه وجه الظابط وقال للعسكرى ماله ده يا عسكرى على الصبح قاله يا فندم اْحنا مسكنا المجرم ده وهو بيدور على لحمه قالى الظابط اْنت ليلة اْهلك سوده لحمه وكنت عايز اْد اْيه انشاء الله قولتله من باب السخريه طبعاَ اْنا كنت عايز كيلو قالى وكمان اْتجار انت هتروح فى ابو نكله ولقيته بيتصل بتليفون وبيقول اْيوا يا فندم احنا قبضنا على اْحدى اْفراد العصابه اْلى بتاجر فى الممنوعات المحرمه دولياَ وهنحوله على النيابه قولتله خلاص بقى ياعم كفايه هزار مش اْنتوا الكاميرا الخفيه قالى خفيه دنا هخفى اسمك من الحياه انت بتهزر معايا ولقيت قفا نازل عليا وصوت بيقول رد على الباشا عدل قالى انت من حقك حاجه واحده بس وهى المحامى ولقيت الموضوع بجد وقولت ما بدهاش بقى قولتله اْنا عايز محامى العيله قالى عيله ماشى ياروح ماما هنجبهولك وجه المحامى بتاعنا وكان اسمه عبد الحفيظ وقعد مع الظابط ولقيت الظابط بيعزم عليه بيسجاره والغريب ان السيجاره مكنتش عديه دى كانت خابور حشيش ولقيته بيقوله معلش اصل انا بحب اشد كوكاين قاله وماله ونادى على العسكرى وقاله روح بسرعه هات لنا تذكرتين كوكاين من فرع كارفور الى جنبنا وتعالى هوا وبعد ساعتين من الشد المتواصل جالى المحامى وقالى اْنت موقفك صعب جداَ فى القضيه لاْنك اْعترفت انك عايز اللحمه قولتله طب العمل دلوقتى ايه قالى ممكن نطلعك منها بس تساعدنى اساعدك فى ايه قالى انت فى المحكمه تقول اْن اْنت كنت عايز تشترى حتة لحمه مش كيلو وبكده تبقى تعاطى مش اْتجار قولتله ياعم انتوا بتهزروا محكمة ايه الى انت بتقول عليها انتوا مجانين وفى المحكمة وطبعاَ المحامى سابنى لاْن المفروض اْنى مرضتش اْساعده وجه وقت مرافعة النيابه وطبعاَ زى كل الاْفلام اْلى بنشوفها كان بيطالب باْقصى العقوبه ونادى القاضى الدفاع لقيت مجموعه من المحامين من كل انحاء العالم قايمين وتقدم المصرى طبعاَ وقال اْحنا ميشرفناش اْننا ندافع عن واحد عايز يدمر شبابنا ويخليه ياكل لحمه ونحن نطالب بعقوبة الاْعدام على كل تجار اللحوم والدهون دا ناقص كمان يدخلولنا الفراخ ماهى بقت ميغه ارجوكم اْغيثونا اْغيثونا والله الموفق لكى الله يا مصر لكى الله يا مصر ونادى الحاجب الحكم بعد المداوله ولقيت مجموعه من الصحافين بيساْلونى انت تتوقع ايه الحكم ولقيت نفسى بقول لهم امشوا بعيد يا ولاد تيييييت وجه وقت الحكم حكمت المحكمه حضوريان على المتهم بلاْعدام شنقاَ فى ميدان عام ليكون عبره لمن يعتبر وهنا اْنا صحيت من النوم واْنا ماسك رقبتى وبقول معقول ده ممكن يحصل اللحمه تبقى ممنوعات والمخدرات تبقى مباحه ياعالم احكموا وليكم التعليق

الأربعاء، 14 أبريل، 2010

حلم مش طبيعى


كنت قاعد مع واحد صاحبى بنتكلم فى اْحدى المواضيع اليومية فالكلام خدنا لموضوع المرتبات والاْجور واْن المرتب مبيكفيش كيلو لبن واتنين جنيه عيش فى اليوم فقال لى اْعلى شويه فى اْوراق المصاريف بتاعت الشركه واْحط الباقى فى جيبى قولتله دى تبقى فلوس حرام قالى هو انت كل حاجه تدخل فيها الدين وسابنى ومشى قعدت اْفكر هو ينفع الحياه تمشى من غير منهج وطبعاَ الدين هو منهج الحياة المهم رواحت البيت ونمت ودخلت فى حلم هوحلم غريب حلمت اْن الدنيا ماشيه من غير قيود ولا شروط ولا حتى دين ولا مبادىْ ولقيت الناس شغاله بطريقه غريبه ستات ورجاله من غير هدوم ومشين فى الشارع عادى جداَ ولا حد بيتعرض ليهم وطبعاَ فى الحلم برده روحت الشغل وشوفت حاجات تشيب الصراف فى يوم القبض يقبض الناس ويغفلهم ويسرق من كل ظرف شويه ولقيت المرتب بتاعى ناقص قولت ايه ده انت حرامى قالى يعنى ايه حرامى انا عايز فلوس عشان اْجيب لاب توب جديد عجبنى قولتله تقوم تسرق زمايلك مش تستاْذن منهم الاْول قالى يعنى اْيه اْستاْذن شكلك مجنون وبتقول كلام اْول مره اْسمعه وقام وسابنى وخرج بره وحاسسنى اْن انا اْهبل قولت اروح اْقعد فى مكتبى افكر فى ايه اْلى بيحصل هى الناس اْتجننيت ولا انا اْلى اْتجننت فى طريقى قولت اروح الحمام لقيت واحد زميلى خارج وبعد كده لقيت واحده زميلتى برده خارجه من نفس الحمام ولقيت واحد زميلى قاعد بره بيخلى باله من اْلى رايح ومن اْلى جاى قولتله انت كده عارف انت اْيه قالى قصدك اْيه قولتله انت كده قرنى ولامواْخذه قالى يعنى ايه قورنى انت بتجيب الكلام ده منين دنت نكته انا بخلى بالى يمكن يحتاج حاجه فوط مثلاَ حد يبدل معاه لو تعب وسابنى ومشى وهو بيغنى انا قورنى هيه انا قورنى وساعتها جالى تخلف عاقلى ايه ده الناس جرالها ايه فين القيم والمبادىْ والدين رواحت البيت لقيت اْبويا بيتفرج على افلام مش ولا بد وماسك اْخويا الصغير وبيقوله اْتفرج يا حبيبى علشان تطلع راجل وعندك خبره ولقيت اْمى بتقوله يخليك لينا يا اْبو حمدى وميحرمناش منك اْبداَ قولت اْطنش هى جات على البيت ماهى خربت قولت لها عايز الغدا لقيتها جيبالى شوية اْطباق فيهم حاجات غريبه رجل حمار ولحمة خنزير وخمرا طبعاْ متتخيلش الترجيع اْلى حصل ليا نزلت الشارع وانا بكلم نفسى وبقول انا بقيت اْهبل انا بقيت اْهبل وفجاْه صحيت من النوم على صوت الاْذان وقولت الحمد لله وصليت وروحت الشغل وانا بفكر فى الحلم ودخلت مكتبى وقعدت وجالى زميلى وقالى هاه فكرت فى الى قولتهولك قولتله يعنى اْيه فكرت انت بتجيب الكلام ده منين يا راجل
يا ناس كل حاجه فى الدنيا اساسها الدين ومينفعش نعيش كده سبهلله من غير منهج ولا دين دى تبقى ميغه

السبت، 10 أبريل، 2010

زمن اْبو الليف


وانا قاعد فى البيت قولت نفسى اسمع حبة اْغانى من بتوع اليومين دول وربنا يسمحنى على الجريمة دى شغلت التلفزيون على اْحدى قنوات الاْغانى ولقيت المفاجاْة شخص مبيعرفش طريق الحمام ده اصلاَ عمره مستحمه ومن الواضح انه كان عايش جوه كهف لغايت لما يجى زمن يقدر يقرفنا فيه ويطلع علينا الطفح بتاعه والمصيبه اْن اْسمه اْبو الليف اْظاهر انه كان مسيطر على الليف اْلى فى مصر كله ومخلى الناس مش عارفه تستحمى وانا الصارحه خايف الشباب تقلده وتلبس خيش زيه ونرجع تانى لعصر المانكايند او رجل الكهف وتعال اسمع وشوف الكلام اْلى بيغنيه بنى ادم بيناقد نفسه يقولك انا بغنى من تانية اْبتدائى من قبل تامر ومحمد حماقى يعنى كل الفتره دى ولسه محسش انه صوته وحش روحت قاعد على النت وقولت اشوف باقى الترجيع الى بيغنيه لقيته بيقول انا مش خرنج انا كنج كونج واضح والله اعلم انه بيعمل عملية اْحياء لنظرية الاْنسان كان اْصله قرد يا ناس ارحمونا دحنا لسه بنحاول نفوق من الاخ شيكو وبعرور والست هيفاء تجبولنا واحد عنده وباء
ملحوظه
اْبعد عنه لاْن وضح ان عنده جرب

الجمعة، 2 أبريل، 2010

ناس كلامها كتير


يا ناس حرام عليكم هيجيلى شلل رباعى من كتر النفاق الناس عماله تنافق وتحك لما خلتنى هبولق واْستفرغ من الى بيقولوه الف سلامه يا ريس حمد له على سلامتك يا ريس دحنا ملاناش غيرك يا ريس كل من هب ودب بيتكلم وبيهنى السياسى والفنان وبتاع الفول كمان
تعالوا شوفوا معايا اْنا من ساعت ماصحيت من النوم فى اليوم اْلى وصل فيه الريس حتى الان وانا بسمع التهانى والتحيات ده حتى كمان التبرعات اْنزل الشارع اْجيب فطار اْلاقى بتاع الفول معلق لوحه مكتوب فيها الفول ملهوش طعم وانت مش وسطنا ياريس الفلافل والبطاطس بتشر بدل الدموع زيت ياريس حتى بتاع الطرشى كاتب طرشجى الحريه بيهنىء الاْمه الاسلاميه برجوع السيد الرئيس الى ارض الوطن وبيقول كيس طرشى هديه فئة جنيه مجاناَ لكل مواطن بمناسبة وصوله بسلامه وتعال اتفرج على البرامج كل برنامج يحصل فيه مداخله تليفونيه يبداْ كلامه بالتهانى حتى لو كان الكلام فى مشكلة الانابيب ده حتى الاْلمان اتعدوا منا وبقوا كل يوم يقرفونا فى عز ما الواحد بيتفرج على فيلم ولا مسلسل يروحوا داخلين باْهم الاْنباء السيد الرئيس بحاله جيده السيد الرئيس دخل الحمام السيد الرئيس فطر طب احنا مالنا ومال ده حتى الريس نفسه زهق منهم وطلع بيان وهو الاول من نوعه بيناشد الناس سيبونى فى حالى بقى
حتى المدونات هى كمان خنقتنا كل مدونه عليها موضوع عن الريس ومرض الريس وشفاء الريس ياناس سيبوا الراجل فى حاله وروحوا شوفوا اْحوال الدنيا فيها اْيه شوفوا الاْقصى بيعملوا فيه ايه شوفوا اْولى القبلتين وثالث الحرمين بيحصل فيه ايه وبلاش رطرطه فى الكلام عن الريس واحمد شوبير ومرتضى منصور احنا زهقنا حراااااااااااااااااااااام