السبت، 7 أغسطس 2010

حلم مش هيحصل


اْسكتوا مش رجعت اْحلم تانى والمره دى مش زى اْى مره تانيه واْرجوكم متقولوش عليا مجنون فى البدايه اْنا كنت قاعد بتفرج على قناة التلفزيون العربى وعلى شكل مصر زمان اْيام ما كان فى ناس بجد المهم كنت بتفرج على اْحدى خطب الرئيس الراحل اْنور السادات وكنت بشرب كباية ينسون تقيله شويه لدرجة اْنى روحت فى النوم وحلمت حلم غريب حلمت اْن اْنا بقيت مسئول عن البلد دى وبقيت رئيس ليها وكان اْول يوم لتولى هذا المنصب وطبعاَ كل الناس كانت منتظرة التغير اْلى هيحصل وهنا انا طلعت اْول قرار باْلغاء جميع الاْحزاب الموجودة فى البلد وثانياَ قررت اْنى اْعمل اْنتخبات لكل منصب فى البلد بمعنى مفيش وزير مسئول هينحط اْلا بلاْنتخاب يعنى الشعب يرشح لكل منصب عدة اْشخاص ويختار اْلى هو عايزه وطبعاَ ده بعد منسمع من كل واحد برنامجه الاْنتخابى ومعطياته ولو فشلنا فى الاْختيار نخليها منظومه كامله من كل المرشحين ونكسب خبراتهم كلهم لصالح البلد وثالثاَ فكرت اْزاى اْزود موارد البلد دى فقررت بدل ما نخلى المستثمرين هما اْلى يكسبوا نخلى الشعب هو اْلى يكسب فافكرت فى الاْهرامات واْبو الهول مثلاَ قررت اْعمل حواليهم ميدان واْعمل فى الصحراء الى حواليهم مدن سياحيه يدخل ربحها للشعب وباقى الصحرا نبنى فيها مساكن للشباب ومدارس وقررت اْعمل عملية تاْميم لبعض الممتلكات الخاصة بالمستثمرين زى طلعت مصطفى واحمد عز وسويرس واْخد منهم اْراضى نبنى فيها مصانع لصالح البلد بدل ماكل حاجه بنستوردها من بره حتى فانوس رمضان وقررت اْسفر مجموعات من الشباب الخرجين لبلاد زى اليابان والصين وتايوان عشان يخدوا خبرة فى كل مجالات الصناعه وبعد كده يجوا يشغلوا المصانع الى هنبنيها ونطلع ناس غيرهم وهكذا وقررت اْعمل حد اْدنى للاْجور اْلف وخمسمائة جنيه وقررت اْن التعملات فى قناة السويس تبقى بالجنيه المصرى وقررت قطع الغاز عن اْسرائيل لاْن فيه ناس كتير فى البلد معندهاش غاز بدل مستورده مش يبقى اْبنى فى اْيدى ودور عليه وقررت اْعمل مشهد من فيلم الجزيرة بس المره دى فى سينا هدخل وحررها من العرب الى فيها ولو عايزين يعيشوا وسطينا فى اْمان اْهلاَ وسهلاَ ولو العكس يبقى هما اْلى اْختاروا وهعمل من سينا اْكبر مدينه صناعية فى الشرق الاْوسط وكل تعاملتها بالجنيه المصرى عشان نخليه يعلا زى اْخوه اليورو حتى لو يبقوا اْخوات فى الرضاعه وهعين مشرف على كل شارع يراقب نظافة الشارع المسئول عنه وهلغى شركات النظافه الاْجنبيه وهعمل شركات مصريه واْعين الشباب الغير متعلمين بمرتبات كبيرة بدل قعادهم على القهاوى ويطلع منهم مسجلين خطر وحراميه ده غير الشباب الى هيشتغلوا فى سينا من عماله ومتخصصين وكله من مصر وقررت اْخلى جزء من اْرباح كل نادى رياضى واْى فيلم سينمائى لصالح البلد مش هما ياكلوا واحنا نموت من الجوع وقبل ما اْكمل المشوار صحيت من النوم على صوت الست جارتنا وهى بتجعر فى ولادها وقمت شغلت اْغنية تامر حسنى اْْنا النهارده صحيت على صوتها الله ياخد ده صوت
معلهش هو حلم اْهبل شويه بس اْنا مالى هو اْنا الى باْلف الحلم المهم تصبحوا على خير

هناك 14 تعليقًا:

  1. ازيك يا محمود ؟؟
    بص هنفترض ان الأحلام دي ترجمة للي عقلك الباطن عايزه و بيفكر فيه .. و بالتالي لو انت شايف ان اللي في الحلم ده هو اللي هيصلح مصر ، فـفي الحالة دي ليا شوية ملاحظات كده

    أولاُ : موضوع الوزارة ده مينفعش الشعب يتدخل فيه ، ممكن يبقى ليه دور بس لكن في الأول و في الآخر الشعب مثلاً ميعرفش مين في دول عمل دراسات في المجال المعين ده أكتر من التاني ، مين اسهاماته أكثر افادة ، مين يستحق و مين ميستحقش ... صعب الشعب يقررها لكن ممكن زي ما قلتلك يبقى ليه دور فيها ، زي أعمال السنة كده D:

    ثانياً : حوار الأهرامات و أبو الهول ده تنساه تماماً
    مش كفاية اللي حصل فيهم لغاية دلوقتي من تدخل عمراني ؟؟
    ده لولا اليونيسكو كان زمان الأهرامات دي مصيرها زي تمثال رمسيس مثلاُ !!
    في أماكن سياحية كتير يا محمود ممكن تعمل فيها اللي انت عايزه ده بس و النبي كفاية بقى مشاريع في القاهرة و الجيزة اللي خلاص على شفا حفرة الانفجار

    حوار التأميم ده بقا أنا واحدة من الناس اللي مبتقتنعش بيه خالص..تجيبها يمين تجيبها شمال ، مينفعش آخد حاجة بتاعة حد و أقرر انم دي في الأصل بتاعة الشعب ف بالتالي لازم ترجعله .. مش عافية هي
    نفس غلطة الثورة لما وزعوا على بعض القصور و الأراضي و الممتلكات
    ممكن بس نفرض عليهم غرامات .. ضرايب كبيرة..أي حاجة
    لكن الممتلكات منمدش ايدنا عليها

    رابعاً : عاجباني قوي حكاية نسفر الناس برة و يرجعوا تاني يفيدوا البلد .. لأن ده كان من أهم أسباب ازدهار مصر في عهد محمد علي
    و نفس النظام بالنسبة الحد الأدني و الغاز..معاك بنسبة 100%

    خامساً فهمني شوية حكاية عرب سيناء دي ؟؟

    سادساً : ليه مصمم تهد المناظر الطبيعية اللي عندنا !!
    سيناء تحولها مدينة صناعية ؟؟
    طب ما تبني مدن صناعية قريبة منها و خلاص
    يبقى ولا اسمك اتعديت عليها و برضه الناس اللي هناك يستفيدوا

    معاك تاني في حكاية النظافة و الضرايب على الأفلام و النوادي ( بس على فكرة هما أساساً علسهم الضرايب دي الفكرة بس نتأكد إن القانون بياخد مجراه زي ما بيقولوا :)

    يا ريت مكونش طولت عليك ، و في انتظار الرد بخصوص عرب سيناء

    ردحذف
  2. انا معاك

    لازم سينا تبقى مهمة , مش مجرد جبال و صحراء و زرع

    لازم يبقى فيه صناعة
    لازم تحصل كثافة سكانية كبيرة
    هي دي القوة

    ردحذف
  3. ربنا يعينك ويساعدك يا ريسنا المنتظر

    ردحذف
  4. الله يخليك ياريس
    حطني وزير اي حاجة

    ردحذف
  5. خلاص قدم وربنا معاك بقى

    ردحذف
  6. حلم جميل ومليان افكار حلوة

    انا معاك يا ريس

    تحياتى

    ردحذف
  7. باحلم........ وأنا مالى

    خالى ....... وهاعيش خالى

    واللى قدرت عليه

    يحلا ويحلالى

    ردحذف
  8. السلام عليكم ورحمة الله وبركاته ..

    الأحلام تجعل الأمل يتجدد لنا .. وهي خير إن رؤى حق .. والأفكار التي طرحتها جميلة ولو أمكن توسيع نطق الفكر على مستوى أمة محمد ككل وليس على مستوى البلد فقط .. فقد يأت يوم تستفيد منها الأجيال القادمة .. أتمنى لك التوفيق وكل عام وأنت بخير.

    ردحذف
  9. كل سنة وانت بكل الخير والسعادة :)

    ردحذف
  10. لسه بتحلم يا محمود ..
    احلم بس خد بالك احسن يتعمل فيك زي ما اتعمل في عادل الامام في فيلم اللعب مع الكبار

    ردحذف
  11. ليش في احلام بتتحق
    اوعى تحلم هيك شي لانك رح تفكر كتير وتتعب نفسك

    ردحذف
  12. كل سنه وانت بخير وسلام
    وعيد سعيد عليك

    ردحذف